Εὐμενίδες

Strophe 1

ΧΟΡΟΣ

143ἰοὺ ἰοὺ πύπαξ. ἐπάθομεν, φίλαι,—

144ἦ πολλὰ δὴ παθοῦσα καὶ μάτην ἐγώ,—

145ἐπάθομεν πάθος δυσαχές, ὦ πόποι,

146ἄφερτον κακόν·

147ἐξ ἀρκύων πέπτωκεν οἴχεταί θʼ ὁ θήρ.—

148ὕπνῳ κρατηθεῖσʼ ἄγραν ὤλεσα.

Antistrophe 1

ΧΟΡΟΣ

149ἰὼ παῖ Διός, ἐπίκλοπος πέλῃ,—

150νέος δὲ γραίας δαίμονας καθιππάσω,—

151τὸν ἱκέταν σέβων, ἄθεον ἄνδρα καὶ

152τοκεῦσιν πικρόν·

153τὸν μητραλοίαν δʼ ἐξέκλεψας ὢν θεός.—

154τί τῶνδʼ ἐρεῖ τις δικαίως ἔχειν;

Strophe 2

ΧΟΡΟΣ

155ἐμοὶ δʼ ὄνειδος ἐξ ὀνειράτων μολὸν

156ἔτυψεν δίκαν διφρηλάτου

157μεσολαβεῖ κέντρῳ

158ὑπὸ φρένας, ὑπὸ λοβόν.—

160πάρεστι μαστίκτορος δαΐου δαμίου

161βαρὺ τὸ περίβαρυ κρύος ἔχειν.

Antistrophe 2

ΧΟΡΟΣ

162τοιαῦτα δρῶσιν οἱ νεώτεροι θεοί,

163κρατοῦντες τὸ πᾶν δίκας πλέον

164φονολιβῆ θρόνον

165περὶ πόδα, περὶ κάρα.—

166πάρεστι γᾶς ὀμφαλὸν προσδρακεῖν αἱμάτων

167βλοσυρὸν ἀρόμενον ἄγος ἔχειν.

Strophe 3

ΧΟΡΟΣ

169ἐφεστίῳ δὲ μάντις ὢν μιάσματι

170μυχὸν ἐχράνατʼ αὐτόσσυτος, αὐτόκλητος,

171παρὰ νόμον θεῶν βρότεα μὲν τίων,

172παλαιγενεῖς δὲ μοίρας φθίσας.

Antistrophe 3

ΧΟΡΟΣ

174κἀμοί γε λυπρός, καὶ τὸν οὐκ ἐκλύσεται,

175ὑπό τε γᾶν φυγὼν οὔ ποτʼ ἐλευθεροῦται.

176ποτιτρόπαιος ὢν δʼ ἕτερον ἐν κάρᾳ

177μιάστορʼ ἐκ γένους πάσεται.