Εὐμενίδες

Episode 7

ἈΘΗΝΑ

566κήρυσσε, κῆρυξ, καὶ στρατὸν κατειργαθοῦ,

567ἥ τʼ οὖν διάτορος Τυρσηνικὴ

568σάλπιγξ, βροτείου πνεύματος πληρουμένη,

569ὑπέρτονον γήρυμα φαινέτω στρατῷ.

570πληρουμένου γὰρ τοῦδε βουλευτηρίου

571σιγᾶν ἀρήγει καὶ μαθεῖν θεσμοὺς ἐμοὺς

572πόλιν τε πᾶσαν εἰς τὸν αἰανῆ χρόνον

573καὶ τούσδʼ ὅπως ἂν εὖ καταγνωσθῇ δίκη.

ΧΟΡΟΣ

574ἄναξ Ἄπολλον, ὧν ἔχεις αὐτὸς κράτει.

575τί τοῦδε σοὶ μέτεστι πράγματος λέγε.

ἈΠΟΛΛΩΝ

576καὶ μαρτυρήσων ἦλθον—ἔστι γὰρ νόμῳ

577ἱκέτης ὅδʼ ἁνὴρ καὶ δόμων ἐφέστιος

578ἐμῶν, φόνου δὲ τοῦδʼ ἐγὼ καθάρσιος—

579καὶ ξυνδικήσων αὐτός· αἰτίαν δʼ ἔχω

580τῆς τοῦδε μητρὸς τοῦ φόνου. σὺ δʼ εἴσαγε

581ὅπως τʼ ἐπίστᾳ τήνδε κύρωσον δίκην.

ἈΘΗΝΑ

582ὑμῶν ὁ μῦθος, εἰσάγω δὲ τὴν δίκην·

583ὁ γὰρ διώκων πρότερος ἐξ ἀρχῆς λέγων

584γένοιτʼ ἂν ὀρθῶς πράγματος διδάσκαλος.

ΧΟΡΟΣ

585πολλαὶ μέν ἐσμεν, λέξομεν δὲ συντόμως.

586ἔπος δʼ ἀμείβου πρὸς ἔπος ἐν μέρει τιθείς

587τὴν μητέρʼ εἰπὲ πρῶτον εἰ κατέκτονας.

ὈΡΕΣΤΗΣ

588ἔκτεινα· τούτου δʼ οὔτις ἄρνησις πέλει.

ΧΟΡΟΣ

589ἓν μὲν τόδʼ ἤδη τῶν τριῶν παλαισμάτων.

ὈΡΕΣΤΗΣ

590οὐ κειμένῳ πω τόνδε κομπάζεις λόγον.

ΧΟΡΟΣ

591εἰπεῖν γε μέντοι δεῖ σʼ ὅπως κατέκτανες.

ὈΡΕΣΤΗΣ

592λέγω· ξιφουλκῷ χειρὶ πρὸς δέρην τεμών.

ΧΟΡΟΣ

593πρὸς τοῦ δʼ ἐπείσθης καὶ τίνος βουλεύμασιν;

ὈΡΕΣΤΗΣ

594τοῖς τοῦδε θεσφάτοισι· μαρτυρεῖ δέ μοι.

ΧΟΡΟΣ

595ὁ μάντις ἐξηγεῖτό σοι μητροκτονεῖν;

ὈΡΕΣΤΗΣ

596καὶ δεῦρό γʼ ἀεὶ τὴν τύχην οὐ μέμφομαι.

ΧΟΡΟΣ

597ἀλλʼ εἴ σε μάρψει ψῆφος, ἄλλʼ ἐρεῖς τάχα.

ὈΡΕΣΤΗΣ

598πέποιθʼ. ἀρωγὰς δʼ ἐκ τάφου πέμψει πατήρ.

ΧΟΡΟΣ

599νεκροῖσί νυν πέπισθι μητέρα κτανών.

ὈΡΕΣΤΗΣ

600δυοῖν γὰρ εἶχε προσβολὰς μιασμάτοιν.

ΧΟΡΟΣ

601πῶς δή; δίδαξον τοὺς δικάζοντας τάδε.

ὈΡΕΣΤΗΣ

602ἀνδροκτονοῦσα πατέρʼ ἐμὸν κατέκτανεν.

ΧΟΡΟΣ

603τοιγὰρ σὺ μὲν ζῇς, ἡ δʼ ἐλευθέρα φόνῳ.

ὈΡΕΣΤΗΣ

604τί δʼ οὐκ ἐκείνην ζῶσαν ἤλαυνες φυγῇ;

ΧΟΡΟΣ

605οὐκ ἦν ὅμαιμος φωτὸς ὃν κατέκτανεν.

ὈΡΕΣΤΗΣ

606ἐγὼ δὲ μητρὸς τῆς ἐμῆς ἐν αἵματι;

ΧΟΡΟΣ

607πῶς γάρ σʼ ἔθρεψʼ ἂν ἐντός, ὦ μιαιφόνε,

608ζώνης; ἀπεύχῃ μητρὸς αἷμα φίλτατον;

ὈΡΕΣΤΗΣ

609ἤδη σὺ μαρτύρησον· ἐξηγοῦ δέ μοι,

610Ἄπολλον, εἴ σφε σὺν δίκῃ κατέκτανον.

611δρᾶσαι γὰρ ὥσπερ ἐστὶν οὐκ ἀρνούμεθα.

612ἀλλʼ εἰ δίκαιον εἴτε μὴ τῇ σῇ φρενὶ

613δοκεῖ τόδʼ αἷμα, κρῖνον, ὡς τούτοις φράσω.

ἈΠΟΛΛΩΝ

614λέξω πρὸς ὑμᾶς τόνδʼ Ἀθηναίας μέγαν

615θεσμὸν δικαίως,—μάντις ὢν δʼ οὐ ψεύσομαι.

616οὐπώποτʼ εἶπον μαντικοῖσιν ἐν θρόνοις,

617οὐκ ἀνδρός, οὐ γυναικός, οὐ πόλεως πέρι,

618ὃ μὴ κελεύσαι Ζεὺς Ὀλυμπίων πατήρ.

619τὸ μὲν δίκαιον τοῦθʼ ὅσον σθένει μαθεῖν,

620βουλῇ πιφαύσκω δʼ ὔμμʼ ἐπισπέσθαι πατρός·

621ὅρκος γὰρ οὔτι Ζηνὸς ἰσχύει πλέον.

ΧΟΡΟΣ

622Ζεύς, ὡς λέγεις σύ, τόνδε χρησμὸν ὤπασε,

623φράζειν Ὀρέστῃ τῷδε, τὸν πατρὸς φόνον

624πράξαντα μητρὸς μηδαμοῦ τιμὰς νέμειν;

ἈΠΟΛΛΩΝ

625οὐ γάρ τι ταὐτὸν ἄνδρα γενναῖον θανεῖν

626διοσδότοις σκήπτροισι τιμαλφούμενον,

627καὶ ταῦτα πρὸς γυναικός, οὔ τι θουρίοις

628τόξοις ἑκηβόλοισιν, ὥστʼ Ἀμαζόνος,

629ἀλλʼ ὡς ἀκούσῃ, Παλλὰς οἵ τʼ ἐφήμενοι

630ψήφῳ διαιρεῖν τοῦδε πράγματος πέρι.

631ἀπὸ στρατείας γάρ νιν ἠμποληκότα

632τὰ πλεῖστʼ ἄμεινον εὔφροσιν δεδεγμένη,

633δροίτῃ περῶντι λουτρὰ κἀπὶ τέρματι

634φᾶρος περεσκήνωσεν, ἐν δʼ ἀτέρμονι

635κόπτει πεδήσασʼ ἄνδρα δαιδάλῳ πέπλῳ.

636ἀνδρὸς μὲν ὑμῖν οὗτος εἴρηται μόρος

637τοῦ παντοσέμνου, τοῦ στρατηλάτου νεῶν.

638ταύτην τοιαύτην εἶπον, ὡς δηχθῇ λεώς,

639ὅσπερ τέτακται τήνδε κυρῶσαι δίκην.

ΧΟΡΟΣ

640πατρὸς προτιμᾷ Ζεὺς μόρον τῷ σῷ λόγῳ·

641αὐτὸς δʼ ἔδησε πατέρα πρεσβύτην Κρόνον.

642πῶς ταῦτα τούτοις οὐκ ἐναντίως λέγεις;

643ὑμᾶς δʼ ἀκούειν ταῦτʼ ἐγὼ μαρτύρομαι.

ἈΠΟΛΛΩΝ

644ὦ παντομισῆ κνώδαλα, στύγη θεῶν,

645πέδας μὲν ἂν λύσειεν, ἔστι τοῦδʼ ἄκος

646καὶ κάρτα πολλὴ μηχανὴ λυτήριος·

647ἀνδρὸς δʼ ἐπειδὰν αἷμʼ ἀνασπάσῃ κόνις

648ἅπαξ θανόντος, οὔτις ἔστʼ ἀνάστασις.

649τούτων ἐπῳδὰς οὐκ ἐποίησεν πατὴρ

650οὑμός, τὰ δʼ ἄλλα πάντʼ ἄνω τε καὶ κάτω

651στρέφων τίθησιν οὐδὲν ἀσθμαίνων μένει.

ΧΟΡΟΣ

652πῶς γὰρ τὸ φεύγειν τοῦδʼ ὑπερδικεῖς ὅρα·

653τὸ μητρὸς αἷμʼ ὅμαιμον ἐκχέας πέδοι

654ἔπειτʼ ἐν Ἄργει δώματʼ οἰκήσει πατρός;

655ποίοισι βωμοῖς χρώμενος τοῖς δημίοις;

656ποία δὲ χέρνιψ φρατέρων προσδέξεται;

ἈΠΟΛΛΩΝ

657καὶ τοῦτο λέξω, καὶ μάθʼ ὡς ὀρθῶς ἐρῶ.

658οὔκ ἔστι μήτηρ ἡ κεκλημένου τέκνου

659τοκεύς, τροφὸς δὲ κύματος νεοσπόρου.

660τίκτει δʼ ὁ θρῴσκων, ἡ δʼ ἅπερ ξένῳ ξένη

661ἔσωσεν ἔρνος, οἷσι μὴ βλάψῃ θεός.

662τεκμήριον δὲ τοῦδέ σοι δείξω λόγου.

663πατὴρ μὲν ἂν γένοιτʼ ἄνευ μητρός· πέλας

664μάρτυς πάρεστι παῖς Ὀλυμπίου Διός,

665οὐδʼ ἐν σκότοισι νηδύος τεθραμμένη,

666ἀλλʼ οἷον ἔρνος οὔτις ἂν τέκοι θεός.

667ἐγὼ δέ, Παλλάς, τἄλλα θʼ ὡς ἐπίσταμαι,

668τὸ σὸν πόλισμα καὶ στρατὸν τεύξω μέγαν,

669καὶ τόνδʼ ἔπεμψα σῶν…

670ὅπως…