Εὐμενίδες

Strophe 1

ΧΟΡΟΣ

490νῦν καταστροφαὶ νέων

491θεσμίων, εἰ κρατή-

492σει δίκα <τε> καὶ βλάβα

493τοῦδε ματροκτόνου.

494πάντας ἤδη τόδ᾽ ἔργον εὐχερεί-

495ᾳ συναρμόσει βροτούς.

496πολλὰ δ᾽ ἔτυμα παιδότρωτα

497πάθεα προσμένει τοκεῦ-

498σιν μεταῦθις ἐν χρόνῳ.

Antistrophe 1

ΧΟΡΟΣ

499οὐδὲ γὰρ βροτοσκόπων

500μαινάδων τῶνδ᾽ ἐφέρ-

501ψει κότος τιν᾽ ἐργμάτων:

502πάντ᾽ ἐφήσω μόρον.

503πεύσεται δ᾽ ἄλλος ἄλλοθεν, προφω-

504νῶν τὰ τῶν πέλας κακά,

505λῆξιν ὑπόδοσίν τε μόχθων,

506ἄκεά τ᾽ οὐ βέβαια τλά-

507μων [δέ τις] μάταν παρηγορεῖ.

Strophe 2

ΧΟΡΟΣ

508μηδέ τις κικλησκέτω

509ξυμφορᾷ τετυμμένος,

510τοῦτ᾽ ἔπος θροούμενος,

511ὦ δίκα,

512ὦ θρόνοι τ᾽ Ἐρινύων.

513ταῦτά τις τάχ᾽ ἂν πατὴρ

514ἢ τεκοῦσα νεοπαθὴς

515οἶκτον οἰκτίσαιτ᾽, ἐπει-

516δὴ πίτνει δόμος δίκας.

Antistrophe 2

ΧΟΡΟΣ

517ἔσθ᾽ ὅπου τὸ δεινὸν εὖ,

518καὶ φρενῶν ἐπίσκοπον

519δεῖ μένειν καθήμενον:

520ξυμφέρει

521σωφρονεῖν ὑπὸ στένει.

522τίς δὲ μηδὲν ἐν δέει

523καρδίαν <ἂν> ἀνατρέφων

524ἢ πόλις βροτός θ᾽ ὁμοί-

525ως ἔτ᾽ ἂν σέβοι δίκαν;

Strophe 3

ΧΟΡΟΣ

526μήτ᾽ ἀνάρχετον βίον

527μήτε δεσποτούμενον

528αἰνέσῃς.

529παντὶ μέσῳ τὸ κράτος

530θεὸς ὤπασεν, ἄλλ᾽

531ἄλλᾳ δ᾽ ἐφορεύει.

532ξύμμετρον δ᾽ ἔπος λέγω,

533δυσσεβίας μὲν ὕβρις

534τέκος ὡς ἐτύμως:

535ἐκ δ᾽ ὑγιεί-

536ας φρενῶν ὁ πάμφιλος

537καὶ πολύευκτος ὄλβος.

Antistrophe 3

ΧΟΡΟΣ

538ἐς τὸ πᾶν δέ σοι λέγω,

539βωμὸν αἴδεσαι δίκας:

540μηδέ νιν

541κέρδος ἰδὼν ἀθέῳ

542ποδὶ λὰξ ἀτίσῃς:

543ποινὰ γὰρ ἐπέσται.

544κύριον μένει τέλος.

545πρὸς τάδε τις τοκέων

546σέβας εὖ προτίων

547καὶ ξενοτί-

548μους δόμων ἐπιστροφὰς

549αἰδόμενός τις ἔστω.

Strophe 4

ΧΟΡΟΣ

550ἑκὼν δ᾽ ἀνάγκας ἄτερ δίκαιος ὢν

551οὐκ ἄνολβος ἔσται:

552πανώλεθρος <δ᾽> οὔποτ᾽ ἂν γένοιτο.

553τὸν ἀντίτολμον δέ φαμι παρβάταν

554ἄγοντα πολλὰ παντόφυρτ᾽ ἄνευ δίκας

555βιαίως ξὺν χρόνῳ καθήσειν

556λαῖφος, ὅταν λάβῃ πόνος

557θραυομένας κεραίας.

Antistrophe 4

ΧΟΡΟΣ

558καλεῖ δ᾽ ἀκούοντας οὐδὲν <ἐν> μέσᾳ

559δυσπαλεῖ τε δίνᾳ:

560γελᾷ δὲ δαίμων ἐπ᾽ ἀνδρὶ θερμῷ,

561τὸν οὔποτ᾽ αὐχοῦντ᾽ ἰδὼν ἀμαχάνοις

562δύαις λαπαδνὸν οὐδ᾽ ὑπερθέοντ᾽ ἄκραν:

563δι᾽ αἰῶνος δὲ τὸν πρὶν ὄλβον

564ἕρματι προσβαλὼν δίκας

565ὤλετ᾽ ἄκλαυτος, ᾆστος.