Χοηφóρoι

Anapests 1

ΧΟΡΟΣ

855Ζεῦ Ζεῦ, τί λέγω, πόθεν ἄρξωμαι

856τάδ᾽ ἐπευχομένη κἀπιθεάζουσ᾽,

857ὑπὸ δ᾽ εὐνοίας

858πῶς ἴσον εἰποῦσ᾽ ἀνύσωμαι;

859νῦν γὰρ μέλλουσι μιανθεῖσαι

860πειραὶ κοπάνων ἀνδροδαΐκτων

861ἢ πάνυ θήσειν Ἀγαμεμνονίων

862οἴκων ὄλεθρον διὰ παντός,

863ἢ πῦρ καὶ φῶς ἐπ᾽ ἐλευθερίᾳ

864δαίων ἀρχάς τε πολισσονόμους

865πατέρων θ᾽ ἕξει μέγαν ὄλβον.

866τοιάνδε πάλην μόνος ὢν ἔφεδρος

867δισσοῖς μέλλει θεῖος Ὀρέστης

868ἅψειν. εἴη δ᾽ ἐπὶ νίκῃ.

ΑἸΓΙΣΘΟΣ

869ἐή, ὀτοτοτοῖ.

ΧΟΡΟΣ

870ἔα ἔα μάλα:

871πῶς ἔχει; πῶς κέκρανται δόμοις;

872ἀποσταθῶμεν πράγματος τελουμένου,

873ὅπως δοκῶμεν τῶνδ᾽ ἀναίτιαι κακῶν

874εἶναι: μάχης γὰρ δὴ κεκύρωται τέλος.

ΟἸΚΕΤΗΣ

875οἴμοι, πανοίμοι δεσπότου πεπληγμένου:

876οἴμοι μάλ᾽ αὖθις ἐν τρίτοις προσφθέγμασιν.

877Αἴγισθος οὐκέτ᾽ ἔστιν. ἀλλ᾽ ἀνοίξατε

878ὅπως τάχιστα, καὶ γυναικείους πύλας

879μοχλοῖς χαλᾶτε: καὶ μάλ᾽ ἡβῶντος δὲ δεῖ,

880οὐχ ὥστ᾽ ἀρῆξαι διαπεπραγμένῳ: τί γάρ;

881ἰοὺ ἰού.

882κωφοῖς ἀυτῶ και καθεύδουσιν μάτην

883ἄκραντα βάζω; ποῖ Κλυταιμήστρα; τί δρᾷ;

884ἔοικε νῦν αὖ τῆσδ᾽ ἐπιξήνου πέλας αὐχὴν πεσεῖσθαι πρὸς δίκην πεπληγμένος.

ΚΛΥΤΑΙΜΝΗΣΤΡΑ

885τί δ᾽ ἐστὶ χρῆμα; τίνα βοὴν ἵστης δόμοις;

ΟἸΚΕΤΗΣ

886τὸν ζῶντα καίνειν τοὺς τεθνηκότας λέγω.

ΚΛΥΤΑΙΜΝΗΣΤΡΑ

887οἲ ᾽γώ. ξυνῆκα τοὔπος ἐξ αἰνιγμάτων.

888δόλοις ὀλούμεθ᾽, ὥσπερ οὖν ἐκτείναμεν.

889δοίη τις ἀνδροκμῆτα πέλεκυν ὡς τάχος:

890εἰδῶμεν εἰ νικῶμεν, ἢ νικώμεθα:

891ἐνταῦθα γὰρ δὴ τοῦδ᾽ ἀφικόμην κακοῦ.

ὈΡΕΣΤΗΣ

892σὲ καὶ ματεύω: τῷδε δ᾽ ἀρκούντως ἔχει.

ΚΛΥΤΑΙΜΝΗΣΤΡΑ

893οἲ ᾽γώ. τέθνηκας, φίλτατ᾽ Αἰγίσθου βία.

ὈΡΕΣΤΗΣ

894φιλεῖς τὸν ἄνδρα; τοιγὰρ ἐν ταὐτῷ τάφῳ

895κείσει. θανόντα δ᾽ οὔτι μὴ προδῷς ποτε.

ΚΛΥΤΑΙΜΝΗΣΤΡΑ

896ἐπίσχες, ὦ παῖ, τόνδε δ᾽ αἴδεσαι, τέκνον,

897μαστόν, πρὸς ᾧ σὺ πολλὰ δὴ βρίζων ἅμα

898οὔλοισιν ἐξήμελξας εὐτραφὲς γάλα.

ὈΡΕΣΤΗΣ

899Πυλάδη, τί δράσω; μητέρ᾽ αἰδεσθῶ κτανεῖν;

ΠΥΛΑΔΗΣ

900ποῦ δὴ τὰ λοιπὰ Λοξίου μαντεύματα

901τὰ πυθόχρηστα, πιστά τ᾽ εὐορκώματα;

902ἅπαντας ἐχθροὺς τῶν θεῶν ἡγοῦ πλέον.

ὈΡΕΣΤΗΣ

903κρίνω σὲ νικᾶν, καὶ παραινεῖς μοι καλῶς.

904ἕπου, πρὸς αὐτὸν τόνδε σὲ σφάξαι θέλω.

905καὶ ζῶντα γάρ νιν κρείσσον᾽ ἡγήσω πατρός:

906τούτῳ θανοῦσα ξυγκάθευδ᾽, ἐπεὶ φιλεῖς

907τὸν ἄνδρα τοῦτον, ὃν δ᾽ ἐχρῆν φιλεῖν στυγεῖς.

ΚΛΥΤΑΙΜΝΗΣΤΡΑ

908ἐγώ σ᾽ ἔθρεψα, σὺν δὲ γηράναι θέλω.

ὈΡΕΣΤΗΣ

909πατροκτονοῦσα γὰρ ξυνοικήσεις ἐμοί;

ΚΛΥΤΑΙΜΝΗΣΤΡΑ

910ἡ Μοῖρα τούτων, ὦ τέκνον, παραιτία.

ὈΡΕΣΤΗΣ

911καὶ τόνδε τοίνυν Μοῖρ᾽ ἐπόρσυνεν μόρον.

ΚΛΥΤΑΙΜΝΗΣΤΡΑ

912οὐδὲν σεβίζει γενεθλίους ἀράς, τέκνον;

ὈΡΕΣΤΗΣ

913τεκοῦσα γάρ μ᾽ ἔρριψας ἐς τὸ δυστυχές.

ΚΛΥΤΑΙΜΝΗΣΤΡΑ

914οὔτοι σ᾽ ἀπέρριψ᾽ ἐς δόμους δορυξένους.

ὈΡΕΣΤΗΣ

915αἰσχρῶς ἐπράθην ὢν ἐλευθέρου πατρός.

ΚΛΥΤΑΙΜΝΗΣΤΡΑ

916ποῦ δῆθ᾽ ὁ τῖμος, ὅντιν᾽ ἀντεδεξάμην;

ὈΡΕΣΤΗΣ

917αἰσχύνομαί σοι τοῦτ᾽ ὀνειδίσαι σαφῶς.

ΚΛΥΤΑΙΜΝΗΣΤΡΑ

918ἀλλ᾽ εἴφ᾽ ὁμοίως καὶ πατρὸς τοῦ σοῦ μάτας.

ὈΡΕΣΤΗΣ

919μὴ ᾽λεγχε τὸν…

ΚΛ…