Χοηφóρoι

Anapests 1

ΧΟΡΟΣ

1007αἰαῖ αἰαῖ μελέων ἔργων:

1008στυγερῷ θανάτῳ διεπράχθης.

1009ἒ ἔ, μίμνοντι δὲ καὶ πάθος ἀνθεῖ.

ὈΡΕΣΤΗΣ

1010ἔδρασεν ἢ οὐκ ἔδρασε; μαρτυρεῖ δέ μοι

1011φᾶρος τόδ᾽, ὡς ἔβαψεν Αἰγίσθου ξίφος.

1012φόνου δὲ κηκὶς ξὺν χρόνῳ ξυμβάλλεται,

1013πολλὰς βαφὰς φθείρουσα τοῦ ποικίλματος.

1014νῦν αὐτὸν αἰνῶ, νῦν ἀποιμώζω παρών,

1015πατροκτόνον θ᾽ ὕφασμα προσφωνῶν τόδε.

1016ἀλγῶ μὲν ἔργα καὶ πάθος γένος τε πᾶν,

1017ἄζηλα νίκης τῆσδ᾽ ἔχων μιάσματα.

Anapests 2

ΧΟΡΟΣ

1018οὔτις μερόπων ἀσινῆ βίτον

1019διὰ παντὸς ἄνατος ἀμείψει.

1020ἒ ἔ, μόχθος δ᾽ ὁ μὲν αὐτίχ᾽, ὁ δ᾽ ἥξει.

ὈΡΕΣΤΗΣ

1021ἀλλ᾽ ὡς ἂν εἰδῆτ᾽, οὐ γὰρ οἶδ᾽ ὅπη τελεῖ,

1022ὥσπερ ξὺν ἵπποις ἡνιοστροφῶ δρόμου

1023ἐξωτέρω: φέρουσι γὰρ νικώμενον

1024φρένες δύσαρκτοι: πρὸς δὲ καρδίᾳ φόβος

1025ᾄδειν ἕτοιμος ἠδ᾽ ὑπορχεῖσθαι κότῳ.

1026ἕως δ᾽ ἔτ᾽ ἔμφρων εἰμί, κηρύσσω φίλοις,

1027κτανεῖν τέ φημι μητέρ᾽ οὐκ ἄνευ δίκης,

1028πατροκτόνον μίασμα καὶ θεῶν στύγος.

1029καὶ φίλτρα τόλμης τῆσδε πλειστηρίζομαι

1030τὸν πυθόμαντιν Λοξίαν, χρήσαντ᾽ ἐμοὶ

1031πράξαντι μὲν ταῦτ᾽ ἐκτὸς αἰτίας κακῆς

1032εἶναι, παρέντα δ᾽—οὐκ ἐρῶ τὴν ζημίαν:

1033τόξῳ γὰρ οὔτις πημάτων προσίξεται.

1034καὶ νῦν ὁρᾶτέ μ᾽, ὡς παρεσκευασμένος

1035ξὺν τῷδε θαλλῷ καὶ στέφει προσίξομαι

1036μεσόμφαλόν θ᾽ ἵδρυμα, Λοξίου πέδον,

1037πυρός τε φέγγος ἄφθιτον κεκλημένον,

1038φεύγων τόδ᾽ αἷμα κοινόν: οὐδ᾽ ἐφ᾽ ἑστίαν

1039ἄλλην τραπέσθαι Λοξίας ἐφίετο.

1040καὶ μαρτυρεῖν μὲν ὡς ἐπορσύνθη κακὰ

1041τάδ᾽ ἐν χρόνῳ μοι πάντας Ἀργείους λέγω:

1042φεύγω δ᾽ ἀλήτης τῆσδε γῆς ἀπόξενος,

1043ζῶν καὶ τεθνηκὼς τάσδε κληδόνας λιπών.

ΧΟΡΟΣ

1044ἀλλ᾽ εὖ γ᾽ ἔπραξας, μηδ᾽ ἐπιζευχθῇς στόμα

1045φήμῃ πονηρᾷ μηδ᾽ ἐπιγλωσσῶ κακά,

1046ἐλευθερώσας πᾶσαν Ἀργείων πόλιν,

1047δυοῖν δρακόντοιν εὐπετῶς τεμὼν κάρα.

ὈΡΕΣΤΗΣ

1048ἆ, ἆ. δμωαὶ γυναῖκες αἵδε Γοργόνων δίκην

1049φαιοχίτωνες καὶ πεπλεκτανημέναι

1050πυκνοῖς δράκουσιν: οὐκέτ᾽ ἂν μείναιμ᾽ ἐγώ.