Ἀγαμέμνων

Strophe 1

ΧΟΡΟΣ

975τίπτε μοι τόδ᾽ ἐμπέδως

976δεῖμα προστατήριον

977καρδίας τερασκόπου ποτᾶται,

978μαντιπολεῖ δ᾽ ἀκέλευστος ἄμισθος ἀοιδά,

980οὐδ᾽ ἀποπτύσαι δίκαν

981δυσκρίτων ὀνειράτων

982θάρσος εὐπειθὲς ἵζει

983φρενὸς φίλον θρόνον; χρόνος δ᾽ ἐπὶ

984πρυμνησίων ξυνεμβολαῖς

985ψαμμίας ἀκάτας παρή-

986βησεν, εὖθ᾽ ὑπ᾽ Ἴλιον

987ὦρτο ναυβάτας στρατός.

Antistrophe 1

ΧΟΡΟΣ

988πεύθομαι δ᾽ ἀπ᾽ ὀμμάτων

989νόστον, αὐτόμαρτυς ὤν:

990τὸν δ᾽ ἄνευ λύρας ὅμως ὑμνῳδεῖ

991θρῆνον Ἐρινύος αὐτοδίδακτος ἔσωθεν

992θυμός, οὐ τὸ πᾶν ἔχων

993ἐλπίδος φίλον θράσος.

995σπλάγχνα δ᾽ οὔτι ματᾴζει

996πρὸς ἐνδίκοις φρεσὶν τελεσφόροις

997δίναις κυκλούμενον κέαρ.

998εὔχομαι δ᾽ ἐπ᾽ ἐμᾶς τοιαῦτ᾽

999ἐλπίδος ψύθη πεσεῖν

1000ἐς τὸ μὴ τελεσφόρον.

Strophe 2

ΧΟΡΟΣ

1001μάλα γέ τοι τὸ μεγάλας ὑγιείας

1002ἀκόρεστον τέρμα. νόσος γάρ <ἀεὶ>

1003γείτων ὁμότοιχος ἐρείδει,

1005καὶ πότμος εὐθυπορῶν

1007ἀνδρὸς ἔπαισεν ἄφαντον ἕρμα.

1008καὶ τὸ μὲν πρὸ χρημάτων

1009κτησίων ὄκνος βαλὼν

1010σφενδόνας ἀπ᾽ εὐμέτρου,

1011οὐκ ἔδυ πρόπας δόμος

1012πημονᾶς γέμων ἄγαν,

1013οὐδ᾽ ἐπόντισε σκάφος.

1014πολλά τοι δόσις ἐκ Διὸς ἀμ-

1015φιλαφής τε καὶ ἐξ ἀλόκων ἐπετειᾶν

1016νῆστιν ὤλεσεν νόσον.

Antistrophe 2

ΧΟΡΟΣ

1017τὸ δ᾽ ἐπὶ γᾶν πεσὸν ἅπαξ θανάσιμον

1020προπάροιθ᾽ ἀνδρὸς μέλαν αἷμα τίς ἂν

1021πάλιν ἀγκαλέσαιτ᾽ ἐπαείδων;

1022οὐδὲ τὸν ὀρθοδαῆ

1023τῶν φθιμένων ἀνάγειν

1024Ζεὺς ἀπέπαυσεν ἐπ᾽ εὐλαβείᾳ;

1025εἰ δὲ μὴ τεταγμένα

1026μοῖρα μοῖραν ἐκ θεῶν

1027εἶργε μὴ πλέον φέρειν,

1028προφθάσασα καρδία

1029γλῶσσαν ἂν τάδ᾽ ἐξέχει.

1030νῦν δ᾽ ὑπὸ σκότῳ βρέμει

1031θυμαλγής τε καὶ οὐδὲν ἐπελ-

1032πομένα ποτὲ καίριον ἐκτολυπεύσειν

1033ζωπυρουμένας φρενός.