Ἀγαμέμνων

Strophe 1

ΧΟΡΟΣ

681τίς ποτ᾽ ὠνόμαζεν ὧδ᾽

682ἐς τὸ πᾶν ἐτητύμωσ—

683μή τις ὅντιν᾽ οὐχ ὁρῶ-

684μεν προνοίαισι τοῦ πεπρωμένου

685γλῶσσαν ἐν τύχᾳ νέμων;—

686τὰν δορίγαμβρον ἀμφινει-

687κῆ θ᾽ Ἑλέναν; ἐπεὶ πρεπόντως

688ἑλένας, ἕλανδρος, ἑλέπτολις,

690ἐκ τῶν ἁβροτίυων

691προκαλυμμάτων ἔπλευσε

692ζεφύρου γίγαντος αὔρᾳ,

693πολύανδροί τε φεράσπιδες

695κυναγοὶ κατ᾽ ἴχνος πλατᾶν ἄφαντον

696κελσάντων Σιμόεντος

697ἀκτὰς ἐπ᾽ ἀεξιφύλλους

698δι᾽ ἔριν αἱματόεσσαν.

Antistrophe 1

ΧΟΡΟΣ

699Ἰλίῳ δὲ κῆδος ὀρθ-

700ώνυμον τελεσσίφρων

701μῆνις ἤλασεν, τραπέ-

702ζας ἀτίμωσιν ὑστέρῳ χρόνῳ

703καὶ ξυνεστίου Διὸς

704πρασσομένα τὸ νυμφότι-

706μον μέλος ἐκφάτως τίοντας,

707ὑμέναιον, ὃς τότ᾽ ἐπέρρεπεν

708γαμβροῖσιν ἀείδειν.

709μεταμανθάνουσα δ᾽ ὕμνον

710Πριάμου πόλις γεραιὰ

711πολύθρηνον μέγα που στένει

712κικλήσκουσα Πάριν τὸν αἰνόλεκτρον,

713παμπορθῆ πολύθρηνον

715αἰῶνα διαὶ πολιτᾶν

716μέλεον αἷμ᾽ ἀνατλᾶσα.

Strophe 2

ΧΟΡΟΣ

717ἔθρεψεν δὲ λέοντος ἶ-

718νιν δόμοις ἀγάλακτον οὕ-

719τως ἀνὴρ φιλόμαστον,

720ἐν βιότου προτελείοις

721ἅμερον, εὐφιλόπαιδα

722καὶ γεραροῖς ἐπίχαρτον.

723πολέα δ᾽ ἔσκ᾽ ἐν ἀγκάλαις

724νεοτρόφου τέκνου δίκαν,

725φαιδρωπὸς ποτὶ χεῖρα σαί-

726νων τε γαστρὸς ἀνάγκαις.

Antistrophe 2

ΧΟΡΟΣ

727χρονισθεὶς δ᾽ ἀπέδειξεν ἦ-

728θος τὸ πρὸς τοκέων: χάριν

729γὰρ τροφεῦσιν ἀμείβων

730μηλοφόνοισι σὺν ἄταις

731δαῖτ᾽ ἀκέλευστος ἔτευξεν:

732αἵματι δ᾽ οἶκος ἐφύρθη,

733ἄμαχον ἄλγος οἰκέταις

734μέγα σίνος πολύκτονον.

735ἐκ θεοῦ δ᾽ ἱερεύς τις ἄ-

736τας δόμοις προσεθρέφθη.

Strophe 3

ΧΟΡΟΣ

737πάραυτα δ᾽ ἐλθεῖν ἐς Ἰλίου πόλιν

738λέγοιμ᾽ ἂν φρόνημα μὲν

740νηνέμου γαλάνας,

741ἀκασκαῖον <δ᾽> ἄγαλμα πλούτου,

742μαλθακὸν ὀμμάτων βέλος,

743δηξίθυμον ἔρωτος ἄνθος.

744παρακλίνασ᾽ ἐπέκρανεν

745δὲ γάμου πικρὰς τελευτάς,

746δύσεδρος καὶ δυσόμιλος

747συμένα Πριαμίδαισιν,

748πομπᾷ Διὸς ξενίου,

749νυμφόκλαυτος Ἐρινύς.

Antistrophe 3

ΧΟΡΟΣ

750παλαίφατος δ᾽ ἐν βροτοῖς γέρων λόγος

751τέτυκται, μέγαν τελε-

752σθέντα φωτὸς ὄλβον

753τεκνοῦσθαι μηδ᾽ ἄπαιδα θνῄσκειν,

755ἐκ δ᾽ ἀγαθᾶς τύχας γένει

756βλαστάνειν ἀκόρεστον οἰζύν.

757δίχα δ᾽ ἄλλων μονόφρων εἰ-

758μί. τὸ δυσσεβὲς γὰρ ἔργον

759μετὰ μὲν πλείονα τίκτει,

760σφετέρᾳ δ᾽ εἰκότα γέννᾳ.

761οἴκων δ᾽ ἄρ᾽ εὐθυδίκων

762καλλίπαις πότμος ἀεί.

Strophe 4

ΧΟΡΟΣ

763φιλεῖ δὲ τίκτειν ὕβρις

764μὲν παλαιὰ νεά-

765ζουσαν ἐν κακοῖς βροτῶν

766ὕβριν τότ᾽ ἢ τόθ᾽, ὅτε τὸ κύριον μόλῃ

767φάος τόκου,

768δαίμονά τε τὰν ἄμαχον, ἀπόλεμον,

769ἀνίερον θράσος, μελαί-

770νας μελάθροισιν Ἄτας,

771εἰδομένας τοκεῦσιν.

Antistrophe 4

ΧΟΡΟΣ

772Δίκα δὲ λάμπει μὲν ἐν

773δυσκάπνοις δώμασιν,

775τὸν δ᾽ ἐναίσιμον τίει [βίον].

776τὰ χρυσόπαστα δ᾽ ἔδεθλα σὺν πίνῳ χερῶν

777παλιντρόποις

778ὄμμασι λιποῦσ᾽, ὅσια προσέμολε

779δύναμιν οὐ σέβουσα πλού-

780του παράσημον αἴνῳ:

781πᾶν δ᾽ ἐπὶ τέρμα νωμᾷ.