Ἀγαμέμνων

Episode 13

ΚΑΣΑΝΔΡΑ

1178καὶ μὴν ὁ χρησμὸς οὐκέτ᾽ ἐκ καλυμμάτων

1179ἔσται δεδορκὼς νεογάμου νύμφης δίκην:

1180λαμπρὸς δ᾽ ἔοικεν ἡλίου πρὸς ἀντολὰς

1181πνέων ἐσᾴξειν, ὥστε κύματος δίκην

1182κλύζειν πρὸς αὐγὰς τοῦδε πήματος πολὺ

1183μεῖζον: φρενώσω δ᾽ οὐκέτ᾽ ἐξ αἰνιγμάτων.

1184καὶ μαρτυρεῖτε συνδρόμως ἴχνος κακῶν

1185ῥινηλατούσῃ τῶν πάλαι πεπραγμένων.

1186τὴν γὰρ στέγην τήνδ᾽ οὔποτ᾽ ἐκλείπει χορὸς

1187σύμφθογγος οὐκ εὔφωνος: οὐ γὰρ εὖ λέγει.

1188καὶ μὴν πεπωκώς γ᾽, ὡς θρασύνεσθαι πλέον,

1189βρότειον αἷμα κῶμος ἐν δόμοις μένει,

1190δύσπεμπτος ἔξω, συγγόνων Ἐρινύων.

1191ὑμνοῦσι δ᾽ ὕμνον δώμασιν προσήμεναι

1192πρώταρχον ἄτην: ἐν μέρει δ᾽ ἀπέπτυσαν

1193εὐνὰς ἀδελφοῦ τῷ πατοῦντι δυσμενεῖς.

1194ἥμαρτον, ἢ θηρῶ τι τοξότης τις ὥς;

1195ἢ ψευδόμαντίς εἰμι θυροκόπος φλέδων;

1196ἐκμαρτύρησον προυμόσας τό μ᾽ εἰδέναι

1197λόγῳ παλαιὰς τῶνδ᾽ ἁμαρτίας δόμων.

ΧΟΡΟΣ

1198καὶ πῶς ἂν ὅρκος, πῆγμα γενναίως παγέν,

1199παιώνιος γένοιτο; θαυμάζω δέ σε

1200πόντου πέραν τραφεῖσαν ἀλλόθρουν πόλιν

1201κυρεῖν λέγουσαν, ὥσπερ εἰ παρεστάτεις.

ΚΑΣΑΝΔΡΑ

1202μάντις μ᾽ Ἀπόλλων τῷδ᾽ ἐπέστησεν τέλει.

ΧΟΡΟΣ

1203μῶν καὶ θεός περ ἱμέρῳ πεπληγμένος;

ΚΑΣΑΝΔΡΑ

1204προτοῦ μὲν αἰδὼς ἦν ἐμοὶ λέγειν τάδε.

ΧΟΡΟΣ

1205ἁβρύνεται γὰρ πᾶς τις εὖ πράσσων πλέον.

ΚΑΣΑΝΔΡΑ

1206ἀλλ᾽ ἦν παλαιστὴς κάρτ᾽ ἐμοὶ πνέων χάριν.

ΧΟΡΟΣ

1207ἦ καὶ τέκνων εἰς ἔργον ἠλθέτην νόμῳ;

ΚΑΣΑΝΔΡΑ

1208ξυναινέσασα Λοξίαν ἐψευσάμην.

ΧΟΡΟΣ

1209ἤδη τέχναισιν ἐνθέοις ᾑρημένη;

ΚΑΣΑΝΔΡΑ

1210ἤδη πολίταις πάντ᾽ ἐθέσπιζον πάθη.

ΧΟΡΟΣ

1211πῶς δῆτ᾽ ἄνατος ἦσθα Λοξίου κότῳ;

ΚΑΣΑΝΔΡΑ

1212ἔπειθον οὐδέν᾽ οὐδέν, ὡς τάδ᾽ ἤμπλακον.

ΧΟΡΟΣ

1213ἡμῖν γε μὲν δὴ πιστὰ θεσπίζειν δοκεῖς.

ΚΑΣΑΝΔΡΑ

1214ἰοὺ ἰού, ὢ ὢ κακά.

1215ὑπ᾽ αὖ με δεινὸς ὀρθομαντείας πόνος

1216στροβεῖ ταράσσων φροιμίοις <δυσφροιμίοις.>.

1217ὁρᾶτε τούσδε τοὺς δόμοις ἐφημένους

1218νέους, ὀνείρων προσφερεῖς μορφώμασι;

1219παῖδες θανόντες ὡσπερεὶ πρὸς τῶν φίλων,

1220χεῖρας κρεῶν πλήθοντες οἰκείας βορᾶς,

1221σὺν ἐντέροις τε σπλάγχν᾽, ἐποίκτιστον γέμος,

1222πρέπουσ᾽ ἔχοντες, ὧν πατὴρ ἐγεύσατο.

1223ἐκ τῶνδε ποινάς φημι βουλεύειν τινὰ

1224λέοντ᾽ ἄναλκιν ἐν λέχει στρωφώμενον

1225οἰκουρόν, οἴμοι, τῷ μολόντι δεσπότῃ

1226ἐμῷ: φέρειν γὰρ χρὴ τὸ δούλιον ζυγόν:

1227νεῶν δ᾽ ἔπαρχος Ἰλίου τ᾽ ἀναστάτης

1228οὐκ οἶδεν οἵα γλῶσσα μισητῆς κυνὸς

1229λείξασα κἀκτείνασα φαιδρὸν οὖς, δίκην

1230ἄτης λαθραίου, †τεύξεται κακῇ τύχῃ.

1231τοιᾷδε τόλμῃ θῆλυς ἄρσενος φονεὺς

1232ἔστιν. τί νιν καλοῦσα δυσφιλὲς δάκος

1233τύχοιμ᾽ ἄν; ἀμφίσβαιναν, ἢ Σκύλλαν τινὰ

1234οἰκοῦσαν ἐν πέτραισι, ναυτίλων βλάβην,

1235θύουσαν Ἅιδου μητέρ᾽ ἄσπονδόν τ᾽ Ἄρη

1236φίλοις πνέουσαν; ὡς δ᾽ ἐπωλολύξατο

1237ἡ παντότολμος, ὥσπερ ἐν μάχης τροπῇ.

1238δοκεῖ δὲ χαίρειν νοστίμῳ σωτηρίᾳ.

1239καὶ τῶνδ᾽ ὅμοιον εἴ τι μὴ πείθω: τί γάρ;

1240τὸ μέλλον ἥξει. καὶ σύ μ᾽ ἐν τάχει παρὼν

1241ἄγαν γ᾽ ἀληθόμαντιν οἰκτείρας ἐρεῖς.

ΧΟΡΟΣ

1242τὴν μὲν Θυέστου δαῖτα παιδείων κρεῶν

1243ξυνῆκα καὶ πέφρικα, καὶ φόβος μ᾽ ἔχει

1244κλύοντ᾽ ἀληθῶς οὐδὲν ἐξῃκασμένα.

1245τὰ δ᾽ ἄλλ᾽ ἀκούσας ἐκ δρόμου πεσὼν τρέχω.

ΚΑΣΑΝΔΡΑ

1246Ἀγαμέμνονός σέ φημ᾽ ἐπόψεσθαι μόρον.

ΧΟΡΟΣ

1247εὔφημον, ὦ τάλαινα, κοίμησον στόμα.

ΚΑΣΑΝΔΡΑ

1248ἀλλ᾽ οὔτι παιὼν τῷδ᾽ ἐπιστατεῖ λόγῳ.

ΧΟΡΟΣ

1249οὔκ, εἴπερ ἔσται γ᾽: ἀλλὰ μὴ γένοιτό πως.

ΚΑΣΑΝΔΡΑ

1250σὺ μὲν κατεύχει, τοῖς δ᾽ ἀποκτείνειν μέλει.

ΧΟΡΟΣ

1251τίνος πρὸς ἀνδρὸς τοῦτ᾽ ἄχος πορσύνεται;

ΚΑΣΑΝΔΡΑ

1252ἦ κάρτα τἄρ᾽ ἂν παρεκόπης χρησμῶν ἐμῶν.

ΧΟΡΟΣ

1253τοὺς γὰρ τελοῦντας οὐ ξυνῆκα μηχανήν.

ΚΑΣΑΝΔΡΑ

1254καὶ μὴν ἄγαν γ᾽ Ἕλλην᾽ ἐπίσταμαι φάτιν.

ΧΟΡΟΣ

1255καὶ γὰρ τὰ πυθόκραντα: δυσμαθῆ δ᾽ ὅμως.

ΚΑΣΑΝΔΡΑ